2022年二月二四，俄羅總統浮丁對隔壁國烏克蘭的殘暴入侵，引起全世界民主國家的大tio̍h驚kah憤怒，同時mā後悔事前對烏克蘭無夠關心kah無夠明確的態度，致使引起俄羅頭人的誤判，出兵拍烏克蘭。類似的情形有可能發生佇中國對台灣的侵略。中國chit幾年加強軍事建設，針對台灣部署新技術、新武器，che是對歸個印太地區穩定的威脅。最近，中國差不多逐工派軍機進入台灣的防空識別區kah海峽中線，中國海軍佇公海上進行演習，意圖壓迫kah恐嚇台灣。趁chit-má猶有時間，美國tio̍h kā對台灣的政策明確化，幫助台灣制定、實施一種新的、koh khah有彈性的戰略
因為按呢，2022年四月十四暗，美國聯邦參議院外交委員會主席、民主黨籍Me-nen-techù（Bob Menendez）kah美國聯邦參議院預算委員會共和黨籍議員Kulahàm-（Lindsey Graham）chhōa國會代表團訪問台灣，拜會蔡英文總統。六月十六聯名提出《2022年台灣政策法案》草案，內容主要分作兩大類：第一大類是主權象徵，推動駐美代表處ùi「台北經濟文代辦事處」正名作「台灣代表處」，指示國務卿撤銷禁止台灣官員訪問美國。第二大類是軍事強化，修正《台灣關係法》美國對台灣的武器供應ùi「防禦式」擴大到「會tàng威懾人民解放軍侵略行為有利的武器。」授權四年內提供45億美金的外國軍事資金撥款。指定台灣作「主要的非北約盟國」。支持台灣參與國際組織。
九月初七，美國白宮國安顧問蘇利萬講，伊會kah國會領袖討論《台灣政策法》，伊坦白講「部分內容hō͘阮小可煩惱」。經過兩遍延期審查，九月十四，美國參議院外委會通過chit-ê受矚目的「台灣政策法案」，續落去tio̍h tī明年一月本屆國會期滿前通過參議院kah眾議院院會，才會遞交美國總統簽署後生效。九月十四會後，本法案提案人講，通過的版本有小可修改，包括駐美代表處改名、美國在台協會（AIT）處長任命需參院通過部分改作「建議」。原版本「外國軍事融資」方式提供台灣4年45億美元，新版加註是「無償」援助，第5年加碼20億美元，變作5年總額65億美元。原版本kā指定台灣作「主要非北約盟友」地位，修改作「以非北約盟友盟友同等待遇」。
Chit-ê法案若通過，中國駐美大使秦剛真受氣講：有《台灣政策法案》tio̍h無中美關係。美國真gâu「放屁安狗心」，法案強調，任何內容攏bē使解釋作kah台灣恢復官方外交關係，抑是改變美國政府對台灣國際地位的立場。
感謝美國koh khah清楚傳達佇各方面協助台灣，提升台美關係加真強。