二月十四，中國一台快艇過界chhoàn入金門海域非法掠魚，hō͘咱國海巡人員驅離，過程中拒絕接受檢查，顚倒彎來斡去那像蛇，緊急tńg彎煞péng船。船頂4個人liàn落海，海巡人員隨時進行搜救，2個救起來猶活，2個無命。二月十五，行政院海委會主委管碧玲佇記者會指出，海巡署守護的水域有兩層，一層是外箍的限制水域、一層是內箍的禁止水域，hit台過界掠魚的船已經進入到禁止水域，海巡署才會依法行政，而且hit台船是無船名、無船證mā無船籍登記，tio̍h是「3無船隻」。Chit種「3無船隻」是兩岸協同執法的時攏特別注意、加強取締的對象。Koh khah離譜的是幾工後傳出，駛船hit個「船長」mā無駕駛執照。Chit隻「4無船隻」可能是破世界紀錄。
二月十六下晡，海巡署艦隊分署第九海巡隊，向金門地檢署報請相驗，檢察官hit暗八點外前往相驗，mā有訊問兩名活tio̍h的人。二月十七，金門地檢署驗屍結果出來，兩名死者身體外觀無致命傷，初步認定兩人是水淹死的。
二月十七暗，中國國台辦指稱，兩岸漁民自古以來佇廈門金門海域傳統漁場作業，無存在啥物「禁止水域、限制水域」的講法。
第二工，海巡署公布查處中國漁船過界掠魚成效，Ùi 2016年七月到2023年十一月為止，趕走中國漁船有9,171台、扣留中國漁船有392台、裁罰中國漁船有301台、罰款有2億8,800外萬、沒收中國漁船有85台。Tio̍h是tōng破中國國台辦所講：「無存在啥物禁止水域、限制水域」的白賊話。
二月十八，海委會主委管碧玲講，海巡署對大陸漁民甚至貨船充滿善意，救援案件無斷過。近三年來，針對大陸人民tio̍h有14件救援，佇海上成功救援20人，幫chān chhōe tio̍h遺體6具，出動的船艦艇93台次，「每一遍出動、每救一條人命，攏是善意、攏是疼心，che才是事實！」
中國國台辦無理氣，干單一直責備台灣海巡署的作法粗魯，koh講無存在「禁止水域、限制水域」。完全bē記得hit台漁船是連中國mā嚴格取締的「4無船隻」。Che那像一個無駕駛執照的人，駛一台無車牌的O-tó-bái駛去起公速公路，交通警察beh去kā取締，伊催油駛koh-khah緊逃走，無小心煞lòng tio̍h高速公路頂的分隔島，一命嗚呼。無理氣的家屬告交通警察tio̍h賠償會失禮，講O-tó-bái是按怎bē使駛起去高速公路？若mài kā伊取締，伊的囝仔tio̍h bē枉死，攏是因為警察傷粗暴！抵tioh chiah呢無理氣的人，叫警察按怎應伊才好？