一月初十，前總統馬英九接受「德國之聲」專訪，表示緩和兩岸緊張tio̍h用和平方式對話，m̄是注重武力備戰；記者追問是m̄是信任中國領導者習近平的時，馬英九應講：「照兩岸關係來講，tio̍h相信伊。」聽tio̍h馬英九講chit款的戇話，強烈引起台灣人民甚至中國國民黨內部的不滿。致使兩工後的總統大選選前之夜造勢晚會，中國國民黨驚kah緊kā馬英九ùi徛台助選名單刣掉，驚伊變作票房毒藥。另一方面，消息傳到中國變作大新聞，習近平的話佇中國都無幾個人相信，佇台灣竟然有一個馬英九叫台灣人tio̍h相信習近平。習近平龍心大喜，隨時命令安排馬英九去北京，習近平親身beh kā馬英九謳咾搔頭殼。所以才有四月初十的「馬習二會」。。
「馬習二會」四月初十上場，專工選tī美國總統拜登kah日本首相Kishi-da Humi-o（岸田文雄）的美日高峰會的前一工。中國明知，美、日聯盟密切合作，一定會繼續應對kah中國有關的挑戰。一定會強調確保台海和平穩定的重要性，兩岸議題必須透過和平方式解決。中國tio̍h特別安排馬英九去參觀「盧溝橋抗戰紀念館」，盧溝橋是八十七年前的1937年七月初七，中日戰爭的爆發點，koh安排馬英九peh起去萬里長城唱抗日歌曲，攏是beh惹起中國人的反日情緒。馬英九chit-ê戇仔攏完全照中國的劇本流目屎演出。
習近平致詞講：馬先生素有民族情懷，堅持九二共識、反對台獨，推動兩岸關係和平發展，促進兩岸青年交流，致力振興中華，我對chia-ê高度評價。 習近平謳咾馬英九的正是馬英九佇台灣支持度chhun 9%的原因。習近平講，兩岸同胞攏是中國人，無啥物心結bē-tàng化解，無啥物問題bē-tàng參詳，無啥物勢力會tàng hō͘咱分開。馬英九致詞講，最近30年，佇兩岸中國人的努力之下，一步一步邁向共同振興中華之路。兩岸的中國人，絕對有夠額的智慧，和平處理兩岸的爭端，避免行向衝突。
可憐的馬英九，習近平假仙m̄知，你也kah人假m̄知！咱台灣政治大學最新民意調查顯示「認為家己是中國人」的比率koh再降新低，干單有2.4% niā-niā。兩岸的中國人，大部分攏佇中國hit岸，台灣chit岸chhun無幾個。
國防大學政戰學院前院長余宗基講：「中國的策略一直是佇世界各國chhōe出會tàng利用的白痴，叫一個國家重要的，退任的、抑是前任的元首來轉達北京的意思，抑是用伊來對抗西方的一個重要的手段。其實中國內部對馬英九mā有非常大的不滿，認為馬英九的華獨比台獨koh khah可怕。」