馬英九前總統敢bē神經錯亂?

 中國一直香港準作「一國兩制」的見本櫉來誘拐台灣,雖然有一寡親像馬英九前總統chit款的戇人,相信中國無論按怎無可能否定鄧小平親嘴所講的香港「五十年變」。但是大部分的台灣人無相信中國共產黨講的話,而且香港人對中國愈來愈嚴格的統治方式食消,一遍比一遍koh khah拼勢teh追求民主kah自由,hō͘北京政府真頭疼。最近m̄-nā烏白掠自由派的議員,連辦報紙的黎智英用違反國安法的罪名掠去關,猶未審判進前,罪名tio̍h一條koh加一條。上蓋離譜的是,今年三月十一,「中國全國人民代表大會」表決通過修改《關於完善香港特別行政區選舉制度的決定》,確保「以愛國者為主體的『港人治港』」。會使講是「一國兩制」的見本櫉歸個拆拆掉。馬英九前總統那像是hō͘中國共產黨的棍仔摃一下才精神,三月十二,馬英九出席孫中山逝世96週年紀念活動接受訪問的時表示,cheùi 1984年鄧小平提出「一國兩制」的想法以來,這個構想正式的進入歷史。馬英九koh講,換一句話來講,che等於是宣告「一國兩制」的死亡,hō͘伊感覺真遺憾。

Koh khah遺憾的是,三月十七,中國國台辦發言人朱鳳蓮唱聲,希望台灣有關政黨kah人士會tàng客觀、務實看待完善香港特區選舉制度的有關做法,hiat-sak偏見,tio̍h明辨是非。意思是講馬英九前總統bē曉辨別事非。

  若講馬英九前總統bē曉辨別事非,m̄免中國國台辦來認證,全台灣的人攏mā知影。2020年八月初十,馬英九前總統講,中國的攻台戰略是「首戰tio̍h是終戰」,意思是講一開始戰tio̍h戰煞,中國一旦發動戰爭tio̍h會tī真短的時間內拍煞,hō͘台灣無機會等美軍來支援,而且現在美軍根本無可能來。做總統的人tio̍h應該mài hō͘戰爭發生。意思是講伊做總統的時,中國無論講啥,伊攏緊講是是是,好好好,tio̍h是避免戰爭。馬英九前總統bē曉辨別是非kah chit款!你若干單聽tio̍h聲,可能會想講是中國對台辦的人teh講話。

  三月十七,美國國務卿富林肯(Antony Blinken)先後有佇日本kah南韓發表談話,指控中國佇東海、南海kah其他國家發生領土爭議的時,in的所講所做愈來愈有侵略性及kah壓迫性,對台灣的姿態,m̄-nā無降低區域緊張,反轉是升懸。伊強調,美國bē恬恬坐leh看無管,而且警告中國bē使烏白亂動,若是有必要,美國會kā反擊拍倒轉。

  馬英九前總統三講四m̄-tio̍h,伊的嘴phóe hông按呢搧過來koh搧過去,馬英九前總統敢bē神經錯亂?  ()210319)