武漢肺炎湠到歐美了後，歐美成作重災區，直直拚轉來台灣的人愈來愈濟，境外移入的確診病例mā忽然間增加真濟。對海外七萬一千外名的留學生，咱政府應該按怎做才tio̍h，是一個真嚴肅的問題。中央流行疫情指揮中心監測組長、mā是疾管署長周志浩表示，坐飛機轉來無抵抵是安全，呼籲留學生若有可能盡量留佇當地mài徙位，m̄-thang去人濟的所在，tio̍h小心保護家己。
中央流行疫情指揮中心監測組長周志浩按呢講，惹起資深媒體人趙少康的受氣，伊tī三月十八“TVBS”政論性談話節目《少康戰情室》內底講，政府chit-má應該加強像講請華航、長榮盡量kah當地國協商，「咱tio̍h kā人接轉來，做bē成、準若是當地國m̄同意是另一回事，你bē使講攏無愛hō͘ in轉來。」講到激動的時，伊甚至頓桌仔表示「恁（指海外留學生）攏總留佇當地，自生自滅好lah！Che是啥物政府！」名嘴尹乃菁mā摻落去講，周志浩叫留學生mài轉來留佇當地，實在真害，「設使講咱的決策官員，是chit款的想法，in是完全m̄知世界chit-má發生了什麼代誌！」
仝一天，眼科女醫生黃宥嘉看趙少康的言行看bē落去，佇伊的面冊頂面唱聲：「咱不滿hiah-ê m̄是醫療專業、m̄是防疫專業的人一直不滿防疫政策哩！Chit-ê世界m̄是頓桌仔的人tio̍h khah厲害！」
四月初六，中央流行疫情指揮中心公布hit工新增加10例確診個案中，有3例是坐仝一台班機，是三月三十ui美國New York飛轉來台灣的華航班機CI－011，而且hit班飛機早前已經有6例確診。四月初七koh加1例，鬥起來已經有10例確診，全機其他的人客攏總ùi居家檢疫轉作居家隔離。
按呢咱tio̍h知影三月十八，中央流行疫情指揮中心監測組長、mā是疾管署長周志浩所表示的，坐飛機轉來無抵抵是安全，呼籲留學生若有可能盡量留佇當地mài徙位。真正有道理，趙少康頓桌仔頓啥意思？
武漢肺炎佇中國有khah平靜了後，大大宣傳講中國是一片净土，外國是足可怕，祖國歡迎恁！致使留學生拚勢組團，歸批歸批轉去中國了後，煞罵講「輸入性病毒」直直入來真危險，講按呢是「病毒倒灌」！
趙少康頓桌仔的仝hit工三月十八，北京市疾病預防控制中心建議，留學生無十分必要，tio̍h應該暫時停止回國。真可惜，咱那像無看tio̍h趙少康受氣頓桌仔罵講：「Che是啥物政府？」若有，逐個會使kā應講：「北京政府！」
趙少康，你那會無koh頓桌仔？