美國chhōe tio̍h失散濟濟年的囝仔—中國

無諾久進前,中國誠流行用「百度地圖」搜chhōe台灣,包括以中國城市名號名的街路,像講南京路、廣州街,抑是kah中國地名相關的餐廳,像講福州魚九乾麵、汕頭火鍋,攏hō͘中國網友感覺誠趣味、誠稀奇,搜chhōe量大大增加,甚至濟kah致使「百度地圖」一時「崩去」無法度使用。

 八月初七,現任中國外交部部長助理、外交部發言人華春瑩女士一時手癢(giauⁿ),用英文佇“Twitter”頂面發表高論,伊佇高論中有貼一張「百度地圖」的截圖,伊講,佇「百度地圖」顯示,台北市有38間山東水餃館、67家山西麵館。味覺bē騙人,台灣一直是中國的一部分。失散(sit-sòaⁿ)濟濟年的囝仔歸尾總是tio̍h轉來厝裡。

    伊的文章一下出來,笑倒幾百萬人。干單笑猶無夠,真濟人真拍拼kā伊恥笑抑是 kā伊正刨(khau)倒削,不止鬧熱,mā增加逐個笑談的資料。台灣資深球評石明謹佇面冊頂面表示,根據統計,台灣有9,000家日本料理店,味覺bē騙人。台灣作家朱宥(iū)勳kā華春瑩的文轉發到面冊,問講:「你敢敢(kám-káⁿ)算台灣有幾間美國式、日本式、韓國式餐廳?猶有義大利麵?」有一位中國網友mā看bē落去,表示講「我害ah,阮厝附近麥當勞星巴克肯德基攏總有,原來我是佇美國!」另外一位中國網友問講,我逐工飲台灣的珍珠奶茶,看beh按怎?

日本《產經新聞》台北支局長Ya-ita san(矢板明夫)佇面冊發文講,伊佇台北tòa兩年半,感覺台北的日本拉麵店、壽司店、居酒屋有影bē少。但是伊知影,絕對無任何一個正常的日本人,會聯想到「台灣的日本餐館chiah呢濟,台灣tio̍h應該屬佇日本。伊koh查了,佇東京竟然有9,000外間中華料理。這個比例應該是全世界主要城市中上懸的。設使有一工,中共外交部會使決定國際秩序,恐驚日本的首都tio̍h會隨時變作中共的o͘h。

台灣有一位網友看報導了後講:「真好笑,華春瑩是用英文發的,真正變作國際笑話。」有影to̍h tio̍h,因為伊用英文寫的koh是佇“Twitter”頂面發表的,才會引起美國國務院前發言人Otagusu(Morgan Ortagus)女士mā仝款佇“Twitter”頂面,先kā華春瑩的PO文截圖,才koh用華春瑩的氣口講:「中國有超過8,500間Ken-thaki餐廳,味覺bē騙人,中國一直是美國Ken-thaki州的一部分。失散濟濟年的囝仔歸尾總是tio̍h轉來厝裡。」

    無意中,美國Ken-thaki州煞chhōe tio̍h失散濟濟年的囝仔—中國.