七月十九，英國《金融時報》獨家報導，四月因為武漢肺炎確診kā原本beh去亞洲訪問行程徒退後的美國聯邦眾議院議長Phe-lo-si（Nancy Pelosi），會tī八月chhōa團去台灣訪問展現支持，伊會是25年來koh有一位美國聯邦眾議院議長去訪問台灣。
七月二九，Phe-lo-si議長啟程前來亞洲了後，中國仝一日tio̍h發布航行警告，七月三十會佇福建平潭水域執行實彈射擊訓練，平潭是台灣海峽上狹的所在，示威味十足。八月初一聽講Phe-lo-si議長初二會到台灣，中國海事局發布航行警告，八月初二會佇南海部分海域進行「軍事訓練」。天津、遼寧、海南海事局同步發出軍事演習航行警告，中國真正有軍事回應。
七月二八，美國總統Biden kah中國國家主席習近平熱線講話中，習近平主席警告美國：sńg火的一定會家己燒tio̍h。中國官方媒體的警告一遍比一遍khah歹。七月二六，中國國防部發言人譚克非表示，中方要求美方以實際行動履行不支持「台獨」的承諾，bē使安排Phe-lo-si訪台。八月初一，中國外交部警告Phe-lo-si若去台灣訪問會後果嚴重，解放軍bē惦惦坐leh-hia無管。前環球時報總編輯胡錫進佇「微博」kah“Twitter”頂面大聲講設使美軍戰機若護送Phe-lo-si訪台，解放軍若kā伊驅離無效tio̍h會使kā「拍落來」；伊講Phe-lo-si若是佇台灣停留，tio̍h是點to̍h台灣海峽局勢火藥桶，解放軍已經做好充分的準備。
八月初二暗十點外，美國聯邦眾議院議長Phe-lo-si chhōa團來台灣訪問，伊佇台灣一工所講的話真要緊。除了謳咾台灣的民主成就kah良好的治理，特別強調美國bē使bē記得1979年「台灣關係法」對台灣的承諾。今仔日中國步步進迫，佇軍事、經濟、外交等各層面打壓台灣。中國可能會tàng阻擋台灣領袖參與國際會議，但是in bē-tàng阻擋世界各國領袖抑是任何人來訪問台灣。伊來到台灣tio̍h是beh傳達美國國會跨黨派對台灣安全的支持，幫助台灣上有效的自我防禦。重新確認，台灣、kah所有民主國家的自由，一定tio̍h受尊重。Phe-lo-si議長來台灣訪問mā戳破「台灣是中國的一部分」chit句世紀的白賊話。
講tio̍h中國，天to̍h烏一旁。聽tio̍h long-long的聲音，原本想講是beh落大雨teh tân雷公。小可仔細聽，才知影是美國聯邦眾議院議長Phe-lo-si beh來台灣訪問，中國四界teh實彈演習，是大砲小銃的聲音beh kā Phe-lo-si議長嚇驚tio̍h。Khah仔細聽，才聽出he是中國大大細細官員teh彈臭屁的聲。
咱深深感謝啥物攏m̄驚的Phe-lo-si議長來台灣訪問！