有人bē-giàn姓蔣,有人足興!

   真濟人攏知影中國有一位藝術家艾未未,chit位異議份子時常發表對社會文化的評論,伊的「背骨」竟然是ùi in老父傳來的。in老父是二十世紀中國上傑出的現代詩人艾青,艾青本名蔣正涵,1928年考入杭州藝專繪畫系,1929年去法國留學。1932年一月回國,五月佇上海加入「中國左翼美術家聯盟」,致使七月hō͘中國國民黨的密探掠去關監,罪名是「顛覆政府」。伊的改姓,有一說是講,佇獄中有一工tio̍h填一張表,寫受刑人的姓名,伊寫「蔣」字干單寫tio̍h草字頭(「艹」),忽然間想起掠伊來關的中國國民黨頭人蔣介石,非常受氣:那會kah chit-ê人仝姓?有夠衰!雄雄佇草字頭(「艹」)的下面拍一個叉仔(「X」),看看一下,將錯就錯,改作姓「艾」ma比姓「蔣」khah爽快,出獄了後m̄-nā所有的創作筆名攏叫作「艾青」,連姓真正改作「艾」

章孝慈去拜訪阮美姝(Ńg bí-tu),跪佇伊的面前講:我是來會失禮chhē m̄-tio̍h。阮美姝滿腹的怨恨、受氣、悲傷做一下拼出來,ùi伊的老父阮朝日—二二八按怎hông掠去hông銃殺講起,講到中國國民黨、講到蔣介石按怎虐殺台灣人。伊當然知影跪佇伊面前chit-ê人是東吳大學校長章孝慈、蔣介石的後生蔣經國的雙生仔子,舉辦過台灣頭一遍的二二八追思音樂會。跪佇伊面前的章孝慈一句話都無應,罵伊一點外鐘無停了後,阮美姝才講:好ah免跪,起來!當伊看tio̍h taⁿ頭起來的章孝慈滿面的目屎,趕緊kā扶起來,kā攬tiâu-tiâu,歸面攏是目屎的阮美姝講:m̄好koh哭,m̄好koh哭,我認你作小弟。Chit款的章孝慈值得咱尊敬,tio̍h是chit款的章孝慈一直到死攏聽in外媽的教示姓章。

  四月初四,有beh參選台北市長的中國國民黨立委蔣萬安,接受記者訪問的時講:蔣介石kah蔣經國的功勞是kā台灣民主的基礎拍好勢,身為的後代,感覺真光榮。伊原本姓章,2005年三月,in老父章孝嚴經由台北市政府民政局、內政部法務部等部門一系列複雜的法律程序,ùi姓章改作姓蔣。

  四月初五,民進黨新北市議員初選參選人陳乃瑜,去到新店第三公墓kah安坑刑場舊址視察,chia是1950年代為tio̍h代替馬場町刑場才設立的,真濟台灣精英佇chia hông銃殺。陳乃瑜講真濟死刑的裁決是蔣介石總統本人簽署的。蔣經國當年負責主導情治單位,伊允准特務會tàng無經過正當程序掠人、koh用酷刑侍候。陳乃瑜beh kā蔣萬安講:民主自由,自了m̄是天落落來的,是一代一代台灣人用青春kah生命換來的,絕對m̄是獨裁者的恩賜!

  趣味的是:有人bē-giàn姓蔣,有人足興!