掛嘴掩實在足要緊!

國內武漢肺炎疫情有khah hê落來。十月三十,台北市長柯文哲認為舊曆過年前tio̍htàng免掛嘴掩;中央流行疫情指揮中心發言人莊人祥反駁,指出「嘴掩猶原是最後一道防線,部分場所嘴掩一定tio̍h掛。」台北市長柯文哲上出名的特點tio̍h是愛烏白講話,伊家己知影,一位外科醫生對疫苗的認識無法度kah一位小兒科醫生比並;一位急診室主任對嘴掩的瞭解無法度kah一位公共衛生醫生相比。台北市長柯文哲的問題出佇「官大學問大」的心態。

「官大學問大」的心態m̄是柯市長的專利,全世界真濟政治人物加減攏有chit種心態。咱以英國首相Johnson作例,2020年初,武漢肺炎開始佇全世界流行的時,伊烏白亂講武漢肺炎無啥物,只不過是一種流行性感冒,完全無做全國性的預防。三月二七,英國Johnson首相確診感染,佇醫生的建議下,tòa入去倫敦一間病院接受進一步檢查、治療,伊是武漢肺炎ùi中國爆發以後,全世界第一個染病的國家領導者。Johnson政府hông批評防疫過頭消極、無要求社交距離、無大規模病毒篩檢,mā無鼓勵逐個掛嘴掩。好佳哉,四月十二伊病醫好出院。若無,伊的女朋友腹肚底的嬰仔出世會chhōe無阿爸。

  九月初,丹麥(Danmark:[ˈtænmɑk])tio̍h已經有八成的人注了兩劑疫苗,是歐盟第一個「全面解禁」的國家,但是丹麥猶原維持嚴格的出入境管制,而且mā要求民眾佇機場、醫療診所等有高風險感染的室內空間tio̍h掛嘴掩。

  十月二二,英國廣播公司有一篇文章問講:英國武漢肺炎確診病例那會一直hiah懸、一禮拜平均46,900個確診?好得英國注疫苗真普遍,chit-má確診病例出現重症住院的機率加真少,但是確診病例煞愈來愈濟。Kah德國、法國、西班牙、意大利等歐洲國家比起來,英國人對掛嘴掩的態度加真放鬆、自由,英國確實有khah濟人無愛掛嘴掩。若kah歐洲幾個國家比起來,英國的武漢肺炎確診病例mā是上懸。有人懷疑che kah英國人無愛掛嘴掩是m̄是有關係?

  舊年初,中國開始流行武漢肺炎、台灣猶無夠嘴掩的時,台灣大學醫學院小兒科教授李秉穎講,逐個若攏確實掛嘴掩,ùi外面轉來厝裡攏有用雪文洗手,一定會減少武漢肺炎的傳染。伊講掛嘴會防止別人傳染病hō͘咱,萬一咱家己有病會防止傳染病hō͘別人。嘴掩若是干單掩tio̍h嘴無掩tio̍h鼻是無采工。

  疫情khah無hiah緊張,中央流行疫情指揮中心考慮各種情況,管制有慢慢一步一步放khah鬆。請逐個tio̍h照in的規劃來做,mài假gâu烏白講話。

  Koh一遍hō͘咱知影:掛嘴掩實在足要緊!    (211105)