七月二六下晡，中國國民黨高雄市長補選候選人李眉蓁成立「千人牽手，蓁高雄新女力」後援會，伊的大家蔡梅紅女士mā出席活動，伊上台致詞，謳咾李眉蓁的種種作為，講李眉蓁是好查某子、好媳婦，講三工三暝mā講bē完，若當選市長會是個好市長。最後「我干單會tàng kā各位講，今仔日我所講的，我咒誓全部攏是真的，我若講假的，胸部（意思是講ne-ne）會變細。」引起逐個大笑。伊koh講：「Che是我真無願意的。」
伊的話，隨時引起各種無仝的評論。時代力量立委王婉諭大罵，「胸部變小」無應該是一種對女性身體的懲罰，koh khah無應該hông the̍h來當作選舉咒誓的khó-jí-á。有記者問幾位男性的立法委員kah市議員的意見，in攏講chit種問題真歹評論；有女性的民意代表罵講，按呢是m̄是暗示講ne-ne khah細的人是定定講白賊？七月二八，民進黨立法委員賴品妤佇伊“IG”（Instagram）頂面PO伊胸部誠súi的頂半身相片，有真濟網友紛紛表示：「伊一定真罕得講白賊」、「伊是一個bē講白賊的的查某人」，意外kā頂日李眉蓁大家kā伊徛台所講的：「阮上大的一個咒誓tio̍h是，若講白賊，胸部tio̍h會變小。」koh補一刀。Mā意外kā ne-ne大細kah有講白賊無講白賊牽做夥。
民進黨高雄市長補選候選人陳其邁講，我讀醫學，我所讀的冊並無讀tio̍h講白賊胸部會變細。伊當然是teh kā摳洗。事實上咱真少聽人咒chit種誓，mā真少聽人講，若講白賊，身軀叼一部分tio̍h會變大變細。
有有有！想起來ah！
1881年意大利一位兒童故事作家科羅箸（Carlo Collodi）寫一個柴頭尪仔名叫作「品努笑」（Pinocchio）的故事，Chit-ê「品努笑」若講白賊，伊的鼻tio̍h會忽然間長一寸，緊koh講一個白賊來掩蓋前仔的白賊，「Siú－」一下鼻隨時koh長一寸。一百四十年來，一本非常受全世界囝仔大細欣賞的童話故事。
1969年至1974年擔任第三十七任美國總統的尼克森（Richard Nixon），因為kā對手總統候選人競選總部偷錄音，惹起天大地大的「水門案」落台，是美國歷史上第一位在任不明譽落台的總統。Tī調查案件中間，身為總統的尼克森一再講白賊，致使有人ùi柴頭尪「品努笑」（Pinocchio）的故事得tio̍h靈感，佇報紙頂面發表一幅漫畫，尼克森總統的鼻因為講白賊愈來愈長，長kah伊的鼻頂面有歇一隻鳥仔teh唱歌。
一個查某人講伊若講白賊ne-ne會變細。Hó͘，按呢o͘h，siang管伊！