台灣音樂家鮑恆毅的風骨!

      七月初七暗新聞報導,今年德國kah中國慶祝建交50週年,各所在陸續會舉辦一寡紀念音樂會,台灣旅歐指揮家鮑恆毅最近有接tio̍h邀約伊一場「中德建交週年紀念音樂會」的指揮,邀請單位講機票住宿(tòa-siok)全包,koh聽講演出謝禮誠大包。鮑恆毅講:「我當然真感謝in有想tio̍hChit件代誌中國的立場當然認為台灣『仝款』適合慶祝,但是我是台灣人,我想我不適合。」鮑恆毅講,「雖然chit遍演出的國家德國是我上想beh爭取的所在,但是顚倒是我che一生拒絕過上緊、拒絕了上assari(阿沙力)的一遍邀約。想到chia,我感謝學業最後一年半,我的國家台灣/中華民國教育部留學獎學金我的栽培。」所以鮑恆毅隨時真客氣拒絕,而且誠有風度邀約介紹hō͘伊的另外一位中國朋友。伊講,「Chit世人若是有機會見證tio̍h台德建交,準講無任何報償,歡喜beh去鬥搬椅仔、鬥夯譜架,會tàng奉獻家己小小的氣力。」

 今年三十歲的鮑恆毅是澎湖人,馬公(Má-keng)高中畢業了考入國立台北教育大學音樂系,2014年畢業,2016年去奧地利維也納國立音樂kah表演藝術大學攻讀管絃樂指揮kah合唱指揮雙碩士。有得tio̍h該大學管絃樂指揮最高演奏文憑,bat佇維也納人民歌劇院等劇院擔任助理指揮。2019年十二月十五,佇波蘭參加第8屆「Towards Polyphony」國際合唱指揮大賽,伊一下手得tio̍h頭獎、最佳蒙台威爾第詮釋獎、最佳現代音樂詮釋獎以及最佳波蘭作品詮釋獎等幾項大獎。雖然伊國籍註明「台灣∕奧地利」,但是主辦單位官方面冊貼圖標示「台灣來的鮑恆毅」。Hit年三月伊佇Slovenia的Aegis carminis國際合唱指揮大賽得tio̍h第2名、最佳Slovenia作品詮釋獎,仝年七月,伊佇Romania得tio̍h第2屆布加勒斯特(Bucharest)音樂學院國際指揮大賽特別獎。2019年使講是鮑恆毅大豐收的一年。2021年三月十一至十四,受邀請去Slovenia擔任國際青年音樂節kah賽事駐節講師。

  鮑恆毅雖然客居海外,但是伊無kā故鄉台灣放bē記得。舊年(2021)十一月二十,鮑恆毅以客席指揮身分kah台北室內合唱團,佇國家演奏廳共同完成《詩kah歌的當代迴響》音樂會,che是由七部以當代台灣詩人詩作譜曲的當代合唱作品。今年八月二八至三十一,鮑恆毅會佇高雄衛武營國家藝術文化中心音樂廳,kah台北室內合唱團表演《發現‧亞美利堅》音樂會。

    台灣會tàng有鮑恆毅chiah呢傑出、chiah呢有風骨的音樂家,咱台灣人實在真歡喜!