台灣的實力,hō͘咱看tio̍h台灣的光!

 今年舊曆年過了,因為中國「武漢肺炎」疫情愈來愈嚴重,全世界確診kah死亡病例愈來愈濟,「嘴am」(華語講作「口罩」)一時之間變作影響國安的戰略物資。搶買「嘴am已經成作一個全民運動。愈緊張,愈濟人買,愈排列愈買無「嘴am

  台灣工具機產業的幾位大老,選擇暫時家己的事業放咧,無求報償,組成一個堅強的「國家隊」,助攻「嘴am產業鏈,希望會tàng解決真濟人買無「嘴am的亂象。Chit-ê「國家隊」的成員,有國家級研究機構工研院kah財團法人精密機械研發中心(PMC)的技術kah人力資源。

 財團法人精密機械研發中心(PMC)的總經理賴永祥講,「政府有beh用一億八千萬來緊急擴建60條「嘴am」生產線,若是以一般的工作進度估算,上緊mā tio̍h半年以後才有可能交貨。但是因為有「國家隊」助攻,快速縮短作一個月。」
一月底,當政府宣布beh徵用全台灣的「嘴am」,統一販賣,而且決定beh家己建造「嘴am」生產線。看tio̍h新聞,東台董事長嚴瑞雄直覺認為有啥物所在無對tâng,「嘴am」的生產設備技術應該無困難,到底是叼一個環節出問題,是缺料?缺工?還是欠生產設備?假使若連上基本的設備都無夠,準講料源充足,「嘴am」mā做bē出來。Kā問題釐清知影原因了後,嚴瑞雄馬上佇公會群組內底呼(ko͘)同業出來鬥相共協力建置生產線。東台董事長嚴瑞雄、瀧澤總經理戴錦雲親身領軍,永進、德大、東培、上銀、大銀、亞崴等公司,mā攏派出上強的高手,帶tio̍h技術kah零組件,上北來支援。賴永祥講,「chit群足無閒的大老闆,竟然攏kā家己的事業放一邊,第一時間跳出來幫忙。In一下到位tio̍h直接khû落去做配線之類上低階的工課,逐天無閒到晚時十點外才離開。」
  賴永祥講,「我佇業界三十外年,第一遍看tio̍h chit款無分彼此的合作,Chit
群120人上強的部隊,兩個月會tàng創造產值約二億的精英,in無求回報,家己帶便當,家己租旅館,家己帶工具箱,干單一個目標,tio̍h是希望「嘴am」產能會tàng早一工上線,緊thang解除社會大眾的不安。

經濟部長沈榮津去看權和機械自動生產線了後mā拍胸坎保證,上慢三月中旬,60條「嘴am」產線攏會裝好勢。每條生產線日產能10萬片估算,台灣「嘴am」日產能會新增加600萬片,加上現有的400萬片產能,日產一千萬片量,台灣會變作全世界第二大的「嘴am」產地。

  台灣的實力,hō͘咱看tio̍h台灣的光!