現看「武漢肺炎」的勢面愈來愈恐怖，逐個mā驚hông傳染tio̍h，每一個人第一個想tio̍h的是「嘴am」，無論按怎供應mā會無夠。政府第一步是一月二四禁止「嘴am」出口。逐個可能攏猶會記得罵的人比賊khah惡，前總統馬英九罵講：「禁止嘴am出口是無人性。」高雄市長韓國瑜khah客氣講：「禁止嘴am出口無抵抵是聰明的作法。」反對的人主要是指責咱政府禁止嘴am外銷去中國，in歸粒頭殼底干單有中國niā-niā。咱看一月韓國送兩百萬片「嘴am」去hō͘中國，照馬英九的講法是「上蓋有人性」，chit-má韓國人無「嘴am」thang掛，按呢敢有「人性」？泰國ùi二月初四開始、上有人性的韓國ùi二月二六開始、法國三月初三宣布開始管制「嘴am」出口；德國、俄羅mā tī三月初四宣布禁止「嘴am」出口，全世界的大國那會攏hiah呢無「人性」？世界衛生組織（WHO）秘書長譚德賽mā tī三月初四呼籲各國tio̍h提高「嘴am」的產能。後知後覺慢咱個外月。
咱政府第二步宣布所有的「嘴am」攏bē使私下買賣，完全交hō͘政府統銷，採取「實名制」，國民身分證末仔字奇數的，拜一、拜三、拜五，雙數的，拜二、拜四、拜六，憑「健保卡」去指定的健保藥房、診所、衛生所買兩片，一片五元。三月初五起改作一遍三片。一個人一禮拜會使買一遍。按呢mā有人嫌傷貴，chit幾工新聞報導，韓國排列排足長買無「嘴am」，一片賣新台幣四十元。「嘴am」工廠、全台灣的健保藥房、診所、各地方衛生所攏tio̍h會tàng kah健保局連線，全台灣郵局動起來，三工內布置完成，「嘴am」送到位。所有的公務人員攏總動起來！有記者問行政院長蘇貞昌，「武漢肺炎」期間新加坡公務員減薪，咱台灣敢有beh減薪？莫怪蘇院長會霸氣應講：M̄-nā bē使減薪，顚倒應該加薪！
咱台灣的工具機公會所屬的會員，聽講台灣會大欠「嘴am」，政府有beh投資一億八千萬起造生產線，隨時有人拚去德國訂機器，大細間工具機公司頭家chhōa師傅來裝來鬥機器，120個一流團隊號作「國家隊」，拚kah無暝無日，緊急擴建六十條生產線，原本至少tio̍h半年以上的工課一個月kā伊完成，全世界攏當teh大欠「嘴am」的今仔日，咱台灣預定三月底四月初開始，每工tio̍h會tàng生產「嘴am」一千三百萬片。
二月二五，全台灣中小學開學，隨時tio̍h應付每一個學生每禮拜會tàng買五片兒童「嘴am」。Che是偌呢無簡單的工程！
Chit遍「武漢肺炎」大災厄，干單「嘴am」tio̍h hō͘咱看tio̍h政府kah民間互相配合kah chiah súi氣。咱會使大聲講：台灣干單講「嘴am」 ，tio̍h蓋倒全世界！