台灣人民向習近平主席大聲喝:NO!

 一月十一,台灣總統副總統kah立法委員選舉,到暗時九點大概結果已經出來,蔡英文總統連任成功。頂遍2016年大選1,228萬外票,蔡英文得689萬外票,得票率56.12%,Chit遍1,430萬外票,蔡英文得817萬外票,得票率57.1% mā有小可增加。蔡英文得票817萬外票,是台灣1996年總統民選以來的上懸票。

 2018年十一月二四台灣九合一選舉,民進黨大輸,致使2019年正月初二中國習近平主席看咱蔡總統過過,才會講啥物「一國兩制台灣方案」。仝hit日下晡蔡英文總統隨時kā hat倒轉去講:阮自了m̄-bat接受過「九二共識」,台灣絕對bē接受「一國兩制」,絕大多數台灣民意mā堅決反對「一國兩制」,che mā是「台灣共識」。台灣人民大歡喜講,che正是咱台灣總統的氣口,有夠讚!蔡英文總統的聲勢一工比一工khah懸,台灣人開始注意蔡英文總統確實有拚勢teh做代誌,愈來愈合意伊。加上香港「反送中運動」,香港政府kah警察對付要求自由民主的香港人,kā街頭kah大學校園作戰場,hō͘佇台灣過tio̍h安隱平靜生活的台灣人大驚:原來「九二共識」tio̍h是「一國兩制」,「一國兩制」tio̍h是chiah呢恐怖的獨裁專制,咱若無寶惜自由民主人權的台灣,有一工咱若接受「一國兩制」,看beh按怎tio̍h好?好死m̄死,中國國民黨提名的總統候選人kah in的黨,抵抵是主張「九二共識」,直直beh phēng過中國hit旁。Kah主張台灣優先,徛佇民主自由人權chit旁的蔡英文總統對立對削!看台灣人beh選叼一旁?

  Chit遍總統副總統大選的結果,hō͘咱看出一個真讚的現象。2018年縣市長大選民進黨選輸失去的縣市,chit遍大選攏顚倒嬴。咱用高雄市作例來講,中國國民黨韓國瑜得89萬外票、民進黨陳其邁得74萬外票。chit遍仝chit-ê韓國瑜作中國國民黨總統候選人,得61萬外票,比選市長減28萬外票,蔡英文總統得109萬外票,比2018年民進黨陳其邁選市長得的票增加35萬外票.。  

  2020年總統副總統大選結束,一月十一暗九點,蔡英文總統召開國際記者會發表勝利感言,伊講:Chit遍選舉結果顯露一個重要的意義,tio̍h是主權kah民主hông大聲威脅的時,台灣人民會koh khah大聲喝出咱的堅持。伊koh一遍呼籲對岸當局,和平、對等、民主、對話,chit八字是兩岸重開良性互動kah穩定發展的關鍵。中國若是koh仝款對台灣一直進逼,提出啥物「一國兩制台灣方案」,台灣無別種選擇,一定tio̍h繼續強化民主防衛的機制,kah有夠力thang保衛臺海安全的國防力量。

  Chit遍總統副總統大選的結果,tio̍h是台灣人民向習近平主席大聲喝:NO!(100111)