中國武漢肺炎按呢害死全世界!

  到四月十六為止,全世界武漢肺炎有2081,969例確診,有138,487例死亡。四月十四,中國外交部發言人趙立堅猶敢講:「設使各國若有借中國的經驗學tio̍h教訓,to̍h bē出現今仔日的災難。」伊按呢講,驚笑破人的嘴?

武漢肺炎已經真嚴重的一月二三,武漢宣布封城。Tī封城進前,有五百萬武漢的人拚teh lōng,走去中國所有的省市,有辦法的人走假那飛飛去世界各國,致使全中國無一個省市無tio̍h災,世界一百六十幾個攏受害。

  中國的經驗有啥thang學?中國kah「世界衛生組織」(WHO)兩個那像一個童乩一個桌頭,害死全世界。舊年十二月底,咱台灣的衛服部hō͘「世界衛生組織」(WHO)的批內底,tio̍h有兩個關鍵詞:「tio̍h隔離治療」kah「非典型肺炎」,「非典型肺炎」tio̍h是「會行路的肺炎」,代表會傳染hō͘別人。一月初五,「世界衛生組織」(WHO)發布消息講「猶未發現人傳人證據......」今仔日,「世界衛生組織」(WHO)煞講,咱hō͘ in的批無講「人傳人」。咱溫和的指揮官陳時中會氣kah罵講,「世界衛生組織」(WHO)是「內行人講外行話」。咱寫批hō͘ in的時,中國已經有七個人teh做隔離治療,啥物狀況需要做隔離治療?敢m̄是真清楚、tio̍h是驚人傳人!陳時中講:「隔離治療若m̄是警訊,啥物才叫做警訊?」伊講,「m̄是會員國的台灣to̍h已經kā chit-ê狀況kā『世界衛生組織』(WHO)講了ah,身為會員國的中國準若無講,按呢m̄是隱瞞,啥物才叫作隱瞞?若是有講,『世界衛生組織』(WHO)m̄是失職,啥物才叫作失職?」

  台灣陸續有禁止tòa佇中國湖北、廣東kah浙江的中國人入境,二月初五「中央流行疫情指揮中心」宣布,因為中國疫情chhèng懸,全中國列入二級以上流行區,tòa佇中國各省市的中國人全面暫緩入境,外國轉來的台灣民眾若有中港澳旅遊史的,tio̍h列入居家檢疫十四工。二月初三「世界衛生組織」(WHO)猶teh呼籲逐國無必要為tio̍h遏止疫情傳播,對中國採取限制旅遊kah貿易。To̍h是按呢,疫情m̄才會湠到全世界hiah呢濶hiah呢緊!

  最近有一篇耶魯大學「冷泉港實驗室」的研究報告講,「設使中國會tàng提早一禮拜、兩禮拜抑是三禮拜,對疫病傳染採取積極干預的措施,tio̍h會tàng降低確診病例66%、86%,甚至到95%。」研究結果koh表明,看tio̍h chit款的研究結果,中國隱瞞、掩蓋疫情有影罪大惡極,所做的會使講是天大的罪孽!

  中國武漢肺炎按呢害死全世界,中國kah「世界衛生組織」(WHO)兩個的罪孽攏走bē去!