中國國民黨kā四大公投舞亂去!

  佇台灣,咱的村里長到縣市長到總統副總統,kah各級民意代表,攏是由人民一票一票選出來的,是人民對人的選擇,tio̍h是選舉;另外一種人民對國家某種政策無滿意,經過立法院來討論作決定,是直接由人民投票來決定的,tio̍h是公民投票,簡稱公投,是人民對事的選擇。

 2021年十二月十八,chit遍由中國國民黨kah民間團體所提出的四大公投案,真可惜是中國國民黨一開始tio̍h舞m̄-tio̍h方向,公投是講某一項政策阮無贊成,由人民來決定保留抑是廢掉。中國國民黨一開始講chit遍公投是替hông罷免掉的前高雄市長韓國瑜報仇,續落去改講是beh「倒閣」hō͘蘇貞昌行政院長落台、教訓鴨霸的民進黨,路尾煞變作kah中國共產黨仝氣口,beh hō͘「反中保台」的民進黨政府一個教訓。原本提出一個公投案,應該用正確的數據、會感動人有力的理由,一條一條提出來說明,hō͘人民充分瞭解,對某一個公投案熱心去tǹg同意票。無,中國國民黨無按呢做,in一直針對人m̄是針對事。

  徛佇「守方」的民進黨政府的做法抵抵顛倒反。咱干單以民進黨政府一直煩惱上有可能bē過關的第18案「反萊豬」作例來講。中國國民黨問講,為啥物民進黨當年反對美國萊牛進口,今仔日贊成美國萊豬進口?理由真簡單,當年反對的時美國萊牛的萊劑(萊克多巴胺)猶無一個標準,2012年七月CODEX(國際食品法典委員會)針對萊劑訂定一個殘劑容許值,有一個國際標準,當然無理由koh再反對。台灣m̄-nā根據CODEX做出來的結果,而且koh加咱國專家tī馬總統時代蔡總統時代各做過一遍的科學風險評估,兩遍評估結論攏是台灣會使採用國際標準。有記者問講馬政府時代贊成進口美國萊牛,是按怎chit-má中國國民黨反對進口美國萊豬咧?中國國民黨立委蔣萬安應講:因為立場無仝。Che完全是無理性無科學的講法。美國牛肉ùi 2012年進口1萬8千公噸,到2019年進口6萬4千公噸,成長將近三倍,八年間台灣民眾平均每年食3公斤美牛,並無人發生啥問題。國際貿易是相對的,咱開放美牛以後,咱國農產品外銷美國的最近五年一月至九月年年增加,ùi 2017年17萬9千外噸、約美金4.31億,到2021年20萬4千外噸、約美金6.73億。咱今年一月才開始進口美國豬,無一年tio̍h beh用公投的方式禁止,一個國家按呢反起反倒完全無信用,beh按怎kah人講生理訂合約咧?當然會影響咱加入“CPTPP”(跨太平洋同伴全面進步協定)的可能性,絕對會影響台灣將來的對外貿易關係。

  好佳哉,chit遍公投結果是:四個不同意,台灣才bē亂落去