Chit遍美國真正起歹ah!

    四月二一,美國參議院外交關係委員會通過《2021戰略競爭法》草案,che是由該委員會主席、民主黨的梅年德茲kah該委員會的少數黨領袖、共和黨的李詩兩人聯名提出的。Chit-ê法案tio̍h koh送交參議院全體會議審議,應該會得tio̍h兩黨支持通過,了後才由總統簽署生效實施。

Chit-ê法案有幾點特色:第一,美國參議院外交委員會以21比1的壓倒性比數通過。四月二一,該委員會發表聲明講,通過chit-ê法案表示兩黨合作了誠好勢。第二,chit-ê法案的內容有kā外交戰略、軍事部署、價值觀競爭、增強美國競爭力攏包涵在內,甚至連遏制中國「掠奪性國際經濟行為」mā攏有記在內。第三,chit-ê法案希望kā中國因素當作歸個美國政府優先考慮的對象,每一個聯邦部門kah機構攏tio̍h指定一名副部長級以上的高級官員,針對美國kah中國的戰略競爭進行政策協調,聯邦預算mā應該kah中國競爭的戰略保持一致。像講資助美國公司kā供應鏈徙出中國,審查中國對美國高等教育kah研究機構的資助kah雙方簽訂的契約。第四,每年用3億美金設立「對抗中國影響力基金」,希望ùi提高「一帶一路」透明度到打擊網路假訊息,攏會tàng積極對抗北京的「負面影響」。第五,美國mā針對家己「後尾門」拉丁美洲厝邊頭尾作守備,推動美洲開發銀行增資800億美金,反擊中國佇中南美洲擴大影響力的借貸佈局。第六,chit-ê法案若正式通過,美國國際媒體署(下面有美國之音kah自由亞洲電台)每年會得tio̍h 1億美金預算;美國政府mā會tī 2022到2026每年向外國提供6.55億美金的援助,協助chiah-ê國家買美國製武器、服務kah培訓,加強印太區域的防禦能力;佇網路安全方面,mā會投入1億美金協助新興市場作數位基礎建設,促進美國的技術出口。最後一點,法案第213節表達國會的政策是:美國國務院kah其他政府機關應該以kah其他外國政府來往的名稱kah規範仝一個方式,kah「台灣經由民主選舉所產生的政府」往來。Che是美國成文法案中,頭一遍以「政府」稱呼台灣。法案kā台灣kah「印太區域」36個國家排作夥,技巧性kā台灣kah其他「國家」同等對待。

    咱聽中國外交部發言人、惡chhìh-chhih的戰狼趙立堅按怎講:「中方對有關議員提出的相關議案表示堅決反對」、「我願意重申,中方致力佇kah美方發展不衝突不對抗、互相尊重、合作鬥陣贏的關係。美方有關人士應該客觀理性看待中國kah中美關係,停止推捒有關涉華消極議案」。那像一隻羊仔咧!按呢咱tio̍h知影,chit遍美國真正起歹ah!

(210507)   

 

註:梅年德茲(Bob Menendez) 李詩(Jim Risch) 英文名僅供參考