Chit陣kah中國一通mā bē使通!

 無管別人按怎講,我認為全世界北朝鮮上有氣魄!「武漢肺炎」確診人數才440人的一月二二,北朝鮮tio̍h宣布ùi hit工開始無限期對所有外國遊客關掉邊界,是世界第一個關掉kah中國的邊界,預防「武漢肺炎」病毒疫情傳入境內,隨時展開國內宣傳kah防疫工作。免講逐個知影,che完全是針對中國遊客入境。對北朝鮮來講至少損失幾百億的觀光收入,因為每年舊曆過年有大批的中國人會去北朝鮮旅遊渡假。第二個關掉邊界的是蒙古,一月二七蒙古關掉kah中國相通的公路邊界。第三個是俄羅,一月三十一關掉所有的邊界關口,而且停止向中國公民發放入境電子簽證。

一月二八,美國聯合航空仕世界第一個宣布取消來往北京、上海kah香港航班,第二工,英國航空進一步宣布暫停所有來往中國直航班機。一月三十一,歐亞非三洲攏總有四十三間航空公司停飛中國。二月二七為止,中國(香港澳門無算在)已經達到78,498例確診、死亡2,744例,台灣猶有kah北京首都機場、上海浦東機場、上海虹橋機場、廈門高崎機場、成都雙流機場等五個航點往來。Hō͘人真hàiⁿ頭!到底是咱政府一再強調的「防疫優先」講假的,抑是有啥物偉大的「理由」比「防疫」koh khah「優先」?

  二月初一,香港一個醫護組織因為不滿政府無全面封掉香港kah中國大陸之間的關卡,hō͘中國人隨時會tàng入來香港,九千醫護人員決定ùi二月初三開始罷工五工,希望會tàng作到禁止任何旅客ùi中國入境香港.。

  新加坡禁止the̍h中國護照、抑是bat去中國的人入境。

    全世界攏驚kah中國有交插,是按怎干單台灣m̄驚?是按怎會m̄驚?

  二月二六,前衛生署副署長李龍騰受邀請去民進黨中常會報告「前進WHO」專案進前,接受媒體聯訪的時,李龍騰坦白講,「上好的防疫方式tio̍h是暫時kah中國停止往來通航三個月」。李龍騰表示,現此時台灣的防疫做了會堪得謳咾,但是未來會按怎猶m̄知。李龍騰講,過去SARS猶未入來進前,伊tio̍h有提議應該kah中國停止往來三個月,但是當時的政府無按呢做,所以SARS tio̍h入來。Chit-má伊猶原認為,上好的防疫方式是暫時kah中國停止來往通航三個月。但是李龍騰mā講,伊相信政府可能有啥物無方便的理由才無按呢做。

  Chit陣的台灣,猶有啥物比防止疫情koh khah「優先」?為tio̍h顧守台灣chit塊土地的清氣,為tio̍h保護兩千三百萬台灣人的生命安全,應該隨時切斷kah中國所有的航線,切斷所有kah中國的人員來往。Chit陣Kah中國一通mā bē使通!