聽tio̍h「你是我的一部分。」確實會hông驚!

 俄羅侵略烏克蘭主要的原因是啥?上簡單的理由是:四月二二,俄羅總統浮丁發表全國演講的時講:「烏克蘭對咱來講m̄-nā是一個隔壁國,koh khah是咱俄羅歷史、文化不可分割的一部分!」兩工後俄羅軍隊tio̍h拍入去烏克蘭。浮丁希望會tàng kā烏克蘭抱轉去俄羅的懷抱,而且伊十分相信烏克蘭人攏足歡迎俄羅軍隊去。伊才會信心滿滿講四工內會tàng收復歸個烏克蘭。

1991年至1992年間,除了塞爾維亞kah蒙特內哥羅(台灣有人譯作「烏山」)之外,其他的民族國家一個一個ùi南斯拉夫獨立,原本的聯邦政體tio̍h按呢沓沓解體去。塞爾維亞kah蒙特內哥羅兩國tī 1992年重新組織成立了南斯拉夫聯邦共和國,希望會tàng成作原本聯邦的繼承者。但是因為新邊界的問題,致使前南斯拉夫各國之間爆發了連續十年久的南斯拉夫內戰

  1992年波士尼亞宣布獨立。全國約430萬人口內底,塞爾維亞人33%,克羅埃西亞人17%,波士尼亞人44%。但是塞爾維亞人的塞族共和國堅決反對波士尼亞獨立,in認為波士尼亞的民族身份是虛假的,波士尼亞的國家地位無歷史合法性,波士尼亞塞爾維亞的一部分。1992年四月戰爭爆發,3年半後1995年十二月十四才結束。Chit場戰爭造成20萬人死亡,200萬人成作難民。領導戰爭的是塞族共和國的穆拉迪奇將軍,因為戰爭中有下令軍隊執行屠殺,所以戰後伊成作戰爭嫌犯。伊逃亡16年後,2011佇塞爾維亞hông掠tio̍h。2017年十一月二二,聯合國前南斯拉夫問題國際刑事法庭判伊無期徒刑。

  見若有外國khah有份量的貴賓來台灣訪問,中國外交部發言人一定會發表抗議講,某某人違反「一中原則」,世界干單一個中國,台灣自古tio̍h是中國神聖領土不可分割的一部分。自古是偌古?1683年,清國康熙帝派遣施琅進攻台灣,1684年清國佇台灣設置台灣府。按呢台灣tio̍h變成中國神聖不可分割領土的一部分?1271年敢無比1683年khah古?蒙古人國號改作「大元大蒙古國」,定都佇今仔日的北京市,統一中國。按呢,敢會使講:中國自古是蒙古領土神聖不可分割的一部分?中國人應該bē同意。百外年前清國拍輸日本,1895年四月十七日kah日本簽訂「馬關條約」,kā臺灣全島kah澎湖列島割hō日本。Siáng講「不可分割」?割kah足清氣咧!中華人民共和國對台灣講「你是我的一部分。」憑啥物?中華人民共和國自1949年十月初一建國到taⁿ,有叼一工、叼一時、叼一分、叼一秒統治過台灣?無,完全無。田無溝、水無流。

  無論叼一國橫霸對另外一國講:「你是我的一部分。」礭實會hông驚!