五月初五,中國國民黨立委徐巧芯公布台灣kah捷克簽定美金1,000萬的「有關建立促進烏克蘭重建初級醫療照護能量同伴關係瞭解備忘錄」,質疑he是台捷簽訂的密約,koh暗指圖利捷克衛生科技院(CHTI)、間接介入捷克政黨政治。徐巧芯立委是kā外交部送交hō͘立法院每一位立委的密級文件部分內容公開出來。伊講伊公開的m̄是機密。Hit-ê文件是立法院審查通過的。
五月初六,外交部開記者會,非常受氣批判徐巧芯用臆的kah想像、烏白亂講,kā兩國合作抹烏作圖利特定政治金主,若是傷害台灣聲譽、損害kah友好國家關係、破壞對烏克蘭援助,受益的是叼一寡國家?無法度排除che是對岸認知作戰。外交部發言人劉永健發布六點聲明,強調立法委員對外交部送交立法委員的密件公文內容若有疑問,外交部會使派員去kā伊說明,但是bē使直接佇媒體面前公開機密文件,「完全無kā國家機密保護看在眼內」。外交部對立委牽涉tio̍h漏洩公務機密,會準備採取法律行動因應。五月初七早起,外交部條法司副司長許柏逸去台北地檢署告徐巧芯牽涉犯公務員涉犯「刑法」第132條第1項「公務員漏洩國防以外機密罪」。
外交部發言人劉永健說明講,ùi俄羅入侵烏克蘭開始,咱台灣政府kah民間tio̍h隨時展開人道援助工作,考量tio̍h台烏之間無正式官方關係,所以主要援助計畫是透過徛近烏克蘭的友好國家,像講捷克、波蘭、立陶宛、斯洛伐克共同進行;另外有一部分計畫,是kah烏克蘭地方政府抑是非政組織(NGO)直接合作。而且烏克蘭猶koh teh戰爭中,本身專心執行復原kah重建的能量有限。中東歐國家kah烏克蘭有久年的互動,對援助烏克蘭mā khah有經驗,而且會tàng直接kah烏國官方接觸。咱kah中東歐國家合作,對咱的援助mā khah有保障。另外,藉tio̍h kah友好國家共同援助烏克蘭,mā進一步強化咱kah中東歐國家的合作經驗kah實質關係,是三贏的合作模式,未來mā對咱國廠商拍入烏克蘭戰後重建的市場有幫助。
五月初六,bat作過立法委員的台北市長蔣萬安挺徐巧芯,講立委是基於職責來提出的,政府機關應該以事實來清楚對外說明。可憐ah!為tio̍h私心庇護仝黨立委講出完全無kā國家機密看在眼內的話。五月初八,中國黨籍的立法院副院長江啟臣接受媒體專訪的時講,徐巧芯是該文件「受文者」,按照國家機密保護法的規定,若是猶未解密,tio̍h應該用秘密會議抑是不公開的方式處理。公文是m̄是機密,m̄是受文者講的,是發文機關講的準算。