政治人物應該尊重而且出席國家典禮!

五月十一,台中市政府證實市長盧秀燕會出席520總統就職典禮,雖然hit工抵tio̍h市議會總質詢,盧市長已經徵求tio̍h hit工早起總質詢議員同意,伊會請假參加總統就職典禮。另外,雖罔立法院藍營黨團決議立委攏無beh出席,但是五月十二副院長江啟臣表示,hit工伊會以副院長身分參加總統就職典禮。

五月十二,黃暐瀚佇面冊發文表示,盧秀燕宣布出席總統就職典禮,江啟臣副院長mā決定出席。好佳哉!中國國民黨內猶有頭腦清楚的人。國家做代先,續落去是政黨,上路尾才是個人。民眾黨講柯文哲主席決定出席總統就職典禮,當然誠好。政黨競爭,選後合作,藍綠白上場比看叼一黨khah好,執政帶領台灣,m̄是kā對方當作是冤仇人,kā伊刣死才會爽。黃暐瀚講:咱真正的敵人m̄是佇台澎金馬chit塊土地頂頭,是向tio̍h咱台灣拍飛彈的hit-ê黨。Chiah呢簡單的道理,真濟人猶分bē清楚。

  五月十二,《中國時報》社論標題講:杯葛520 國民黨會成作歷史罪人。 

五月十三,立法院中國國民黨團書記長洪孟楷表示,黨團大會一致決議是無beh出席520總統就職典禮,但是按呢m̄是代表杯葛。拜託咧!洪孟楷講是美國留學的,杯葛英文字“boycott”的意思伊是bat抑是m̄-bat?根據《劍橋詞典》的解說是:拒絕買一種產品抑是拒絕去參加一種活動的強烈無贊成的表現。所舉的例句有一個是:工會號召伊的成員杯葛(拒絶參加)會議。

台北市長蔣萬安早前有表示講,原本有訪問日本的行程,無法度出席520總統就職典禮,五月十三,伊講有請幕僚聯繫調整行程,台北市政府表示行程已經調整好勢,蔣市長會出席520總統就職典禮。

五月十四早起,桃園市長張善政表示520會參加總統就職典禮。Hit工抵tio̍h議會總質詢,伊已經向議會請假、mā得tio̍h同意,520總質詢有4位議員登記質詢,經過議長協調3位議員同意伊請假,由副市長接受總質詢,另外一位民進黨議員黃家齊同意改日期質詢。張善政市長希望帶tio̍h「不分藍綠、好好做代誌」的精神出席520祝賀總統就職,mā希望代表桃園市民祝賀。

六都市長干單新北市長侯友宜無beh參加總統就職典禮,伊講市政無閒。假那小學生走相jek比賽走輸人,講無愛kah走贏hit-ê人講話。

  五月十二《中國時報》社論有一段話講得誠好:政黨惡鬥,人民早tio̍h厭惡!政治人物若真正為tio̍h國家好、m̄是為tio̍h權力私利,tio̍h應該尊重而且出席國家典禮!