台灣有台灣的國法!

四月中,一位佇雲林縣擔任看護的菲律賓女性移工伊蘭‧奧直多(Elanel  Ordidor),佇面冊頂面批評菲律賓總統杜特蒂的武漢肺炎政策。根據「菲律賓勞工kah就業部」的「菲律賓外勞辦事處」“POLO家己聲明講,“POLO駐台官員有月二十去拜訪奧直多小姐,伊講,伊佇網路頂面攻擊杜特蒂總統的「不實言論」已經構成犯罪,佇台灣kah菲律賓攏會hông起訴。目前“POLOtng teh kah奧直多的雇主kah仲介參詳,要求伊「遣送轉去菲律賓」。

POLO”駐台官員目睭底敢有台灣的國法?

  四月二七,台灣外交部對chit件代誌表示,咱國是一個主權國家,外籍移工佇咱國享有國民待遇,包括言論自由在內的權益攏總受tio̍h保障,希望各國政府尊重。外交部講,本案任何人抑是機構攏無權利向移工本人、伊的雇主抑是仲介施壓,mā無應該tī兩國政府猶未協調進前,tio̍h講beh遣送當事者轉去in國。

  Kah“POLO”仝款m̄-bat字的是菲律賓總統府發言人羅奎(Harry Roque)四月二九表示,該移工去留取決佇台灣當局,因為遣送行為有影tio̍h看台灣當局的決定,但是伊無代無誌補充一句講,「該移工命運取決佇台灣kah中國,台灣是中國一部分」。羅奎按呢講,目睭底敢有台灣的國法?Tī chit-ê時陣講「台灣是中國的一部分」是啥意思?講chit種話實在不如咱雲林縣的勞工處長張世忠頭殼的清楚。張處長講,所有來台灣的移工攏享有言論自由,法律之前人人平等,台灣是一個法治的國家,bē秤彩kā移工遣送轉去,外籍看護工若無違反中華民國法令縣政府一定tio̍h保障伊的工作權kah相關的權益。縣政府尊重移工的意願kah雇主的權益,mā請菲律賓佇台灣辦事處尊重台灣的法律。

  菲律賓駐台灣辦事處m̄-nā足尊重台灣的法律、mā足瞭解台菲兩國的關係。四月二九,菲律賓駐台代表巴納佑(Angelito Banayo)對in國的勞工部官員片面表達「遣送轉去」hiah-ê話,向咱國外交部會失禮。菲國駐台機構、馬尼拉經濟文化辦事處(MECO)今仔日證實chit件代誌,而且koh再聲明並無收tio̍h任何beh遣送hit位移工的指示。巴納佑講,遣送任何人轉去是一國的主權行為,攏總屬佇台灣政府主權範圍,干單台灣政府有權利決定。伊講,「台灣人佇菲國投資數十億美金,佇菲台兩國僱用成千上萬的菲律賓人。菲台友誼悠久,台灣一向有tī菲律賓抵tio̍h危害災難的時陣援助咱,「為什麼咱tio̍h惹台灣受氣、刺激in的敏感神經咧?」

  台灣有台灣的國法,任何人佇台灣攏tio̍h尊重、tio̍h遵守。