五月二十，新任總統賴清德就職，中國國民黨立法委員謝衣鳯現身就職典禮，引起注意。有真濟位中國國民黨立委對謝衣鳯現身520總統就職典禮反應無仝，中國國民黨立委王鴻薇講，感覺gông-ngia̍h、非常tio̍h驚，「當我看tio̍h謝衣鳳委員出席，個人有hông『背叛』的感覺。」。
謝衣鳯參加520總統就職典禮，接受訪問的時表示，伊是以立法委員身分出席，希望朝野mài對立、有爭議的法案會tàng協商。
對謝衣鳯參加520總統就職典禮，中國國民黨立法院黨團書記長洪孟楷回應媒體詢問的時講，個別委員的行為，tio̍h由個別委員對外說明。中國國民黨立委黃健豪表示，黨團有要求個別委員儘量mài出席520總統就職典禮，但是che是建議性質，每一位委員有隨人的考量，尊重委員個人的考量kah選擇。
中國國民黨籍的立法院副院長江啟臣有去參加520總統就職典禮，王鴻薇看tio̍h，那會無「hông『背叛』的感覺」咧？Che tio̍h那像台灣俗語話所講的：「欺負軟土khah無刺。」王鴻薇干單敢推軟仔，m̄敢對副院長講半句。
1987年七月十五，前總統兼中國國民黨主席蔣經國宣布台灣地區解除戒嚴令，黨禁mā自按呢失效，政黨政治開始充滿活力。李登輝前總統執政12年（1988年至2000年），推行一系列的臺灣民主化了後，黨國體制才慢慢行入歷史，甚至tī 2000年中華民國總統選舉頭一遍政黨輪替，改由民主進步黨執政，中華民國自按呢邁入兩黨制體制。2016年起，蔡英文總統執政連續無停推動黨產條例、國家人權博物館組織法、促轉條例、政治檔案條例、威權時期國家不法權利回復條例等轉型正義，才一步一步平反黨國體制所製造成的不義行為。
自由民主國家的人一定是kā國家排佇第一，續落去是黨，最後才是個人。但是獨裁政權的黨國思想攏是kā黨排佇第一，親像中國的頭人習近平才會喝講：軍隊姓黨，以黨治國。早前tī蔣介石、蔣經國兩位總統統治下的台灣mā是按呢。想bē到台灣民主化已經二十外年ah，黨國體制遺毒陰魂不散，看tio̍h謝衣鳳立委出席520總統就職典禮，王鴻薇才會有hông「背叛」的感覺。
五月十二，言論一向偏藍的《中國時報》社論標題講：杯葛520 國民黨會成作歷史罪人。內文講：政黨惡鬥，人民早tio̍h厭惡！政治人物若真正為tio̍h國家好、m̄是為tio̍h權力私利，tio̍h應該尊重而且出席國家典禮！按呢，咱tio̍h 知影，原來拒絕參加520總統就職典禮的中國國民黨立法委員是背叛國家kah人民，若無那會成作歷史罪人咧！？