出兵保護台灣,拜登總統是表明決心!

美國總統拜登就任以來,頭一遍來亞洲訪問。五月二三,拜登總統kah日本岸田文雄(Kishida Fumio)首相佇聯合記者會頂面,雙方攏重申台灣安全的重要性。有一位記者問拜登總統,「設使中國入侵台灣,你願意為保護台灣介入軍事行動嗎?」拜登總統直剖應講:「是。」Chit位記者koh追問:「你願意?」拜登總統應講:「Che是阮做過的承諾。」

拜登總統並無對chiah-ê話有做啥物說明抑是澄清。無對chiah-ê話進行說明抑是澄清。伊chit-ê聲明hō͘一寡佇記者會現場的美國官員tio̍h驚,in無想tio̍h總統會表達出chiah呢直接chiah呢白的決心。美國一向警告中國m̄-thang對台灣動武,但是設使若發生chit種狀況的時,程度上會有偌大援助台灣,美國可能是為tio̍h戰略的目的,一向攏是含含糊糊、濛霧無清的態度。

    白宫堅持講拜登總統並無打破長期以來的政策。Che並m̄是拜登總統頭一遍暗示美國beh為台灣來戰,但是伊頂遍發表類似言論的時,媒體攏kā看作是典型的拜登式「口誤」。Chit遍媒體應該真清楚伊是講真的。他佇東京强调講,對台灣的入侵,那像烏克蘭戰爭的災難——伊願意採取koh khah濟的措施來阻止chit場災難的發生。伊hit當時hō͘俄羅總統浮丁傷濟理由去懷疑美國對烏克蘭的支持力頭。所以伊chit遍愛對中國習近平主席講清楚。

  美國kah中國佇「一個中國」頂面有認知上的增差。美國國務院發言人普萊斯(Ned Price)佇Twitter頂面上反駁中國講:「中華人民共和國繼續公開錯誤描述美國的政策。美國並無同意中華人民共和國的一個中國原則。阮久長以來無分黨派一直拼勢佇台灣關係法、三個聯合公報kah六項保證指引下面的一個中國政策。」承認「一個中國」是kah中國建立外交關係的基礎。佇chit-ê政策下面,美國承認中國、kah中國建交而且斷絶了kah台灣的正式外交關係。中國政府家己所講的「一個中國」原則是,台灣是中國不可分割的一部分,歸尾tio̍h kah中國大陸統一。但是美國表示一個中國政策並m̄是對北京立場的認可,事實上,作為政策的一部分,華盛頓kah台灣一直有保持「良好的非官方」關係,包括繼續向台灣出售武器,幫助台灣提升自衛能力。

    「台灣關係法」並無要求美國tī台灣受攻擊的時tio̍h介入台灣的防衛,干單規定美國應向台灣提供自衛的武器。包括特朗普在内的歷任美國總統攏bat 暗示美國會為台灣來戰,但是攏thiau工含糊無愛講清楚。

    Chit遍美國拜登總統直講明講會出兵保護台灣,是表明決心。