二月二四，俄羅入侵的戰車衝過烏克蘭邊界了後，歸個烏克蘭陷入驚惶kah緊張。俄羅唱聲九十六點鐘內（意思是講四工內）tio̍h完全解決烏克蘭。到taⁿ已經過了十六個九十六點鐘，烏克蘭全體軍民那像愈戰愈勇，當然是全體烏克蘭軍民有堅定保衛家己的國家的決心kah意志，但是be-tàng無提起值得尊敬的澤連斯基（Chê-lian-su-ki）總統。伊决意留佇首都基輔（ki-hú），伊命令高级助手、所有的內閣成員kah大部分政府官員攏留落來。歸個官僚機構真緊tio̍h順利進入戰時狀態。俄羅入侵的第二工，伊tio̍h向全國軍民講：「啥物武器咱攏bē使放落來，咱beh保衛咱家己的國家。」
澤連斯基（Chê-lian-su-ki）一直kah國內上主要的政敵、前總统彼得‧波羅申科（Poroshenko）吵鬧無煞，但是戰爭爆發了，in兩人隨時達成和解，佇國旗下面團結起來。咱mā有佇電視報導中看tio̍h前媲統彼得‧波羅申科全副武裝，夯銃teh保衛國家的鏡頭。
每早起，澤連斯基第一項代誌tio̍h是聽武装部隊司令的電話簡報了，才開內閣視訊會議。伊佇基輔街頭四界行、去病院探訪受傷的軍人、去孤兒院送一台iPad平板電腦hō͘作生日的囝仔，伊去到叼位翕相到叼位，逐工佇面冊頂面現身，傳達伊的勇氣kah自信，證明一個有勇氣的人會擋抵千軍萬馬。伊當然知影每工暴露家己的行蹤風險誠懸，但是安定民心比驚hông暗殺koh khah要緊。
戰争初期，伊放鬆貨物運輸管制，解决首都基輔糧倉欠缺的重大風險。三月伊kā營業稅降低到2%，才koh再變作隨便業主納稅，伊講：恁會tàng納tio̍h納，bē-tàng納mā無要緊。致使真濟貨運公司自願載貨去首都攏無收運費。
澤連斯基（Chê-lian-su-ki）總統那像傳說中的趙子龍，歸身軀攏是膽，伊完全無考慮俄羅軍力比烏克蘭強過幾十倍，伊勇敢應戰。親像《聖經》中的少年大衛，面對腓利士營一個懸koh大、以色列軍隊看tio̍h伊會驚、歸身戰甲的歌利亞，大衛伸手入袋á內，the̍h一塊石á出來，用索hìⁿ去，射tio̍h歌利亞ê頭額，石á沉入頭額；伊就倒落去，面仆佇地裡。澤連斯基（Chê-lian-su-ki）總統仝款靠計謀以弱勝強，用技巧kah智慧來嬴過世界第二大軍事國俄羅。
澤連斯基（Chê-lian-su-ki）總統一直保持一個民選領導者的人情味，不管時佇公開場合kah記者、內閣成員、外國來訪的領導者，甚至kah烏克蘭平民百姓接觸、談話的方式，攏hō͘人感受tio̍h親切、溫暖。
Chit款的澤連斯基（Chê-lian-su-ki）總統，實在值得咱尊敬！ (220429)