五月初二，中國國民黨立委吳斯懷佇立法院外交、國防委員會質詢表示，m̄-thang親像衛福部長陳時中「逢中必反」，老共的「孔子學院」舞chiah濟年，當初做得hiah好，一定有伊的優點，咱tio̍h以敵為師，tio̍h學「孔子學院」。
佇台灣真濟看起來巧巧的人，因為有「中國屎khah芳」的變態心理，講話khah會精差去。像講chit兩年，有一寡人叫咱政府tio̍h採用中國製疫苗。好得咱政府有堅持、無插in。今仔日證明，中國疫苗對武漢肺炎變種的Delta病毒無防護力，對Omicron變異病毒koh Khah免講，注三劑mā無效果。
2004年，中國成立「孔子學院」，由中國教育部所屬的國家漢語國際推廣領導小組辦公室管理，總部設佇北京，中國境外的「孔子學院」攏是分支機構。是中國政府為tio̍h向世界推廣漢語、增進世界各國對中國的瞭解所設立的官方機構。課程分四大類，上主要是學華語，第二類是包含中國茶文化、漢字演變kah漢字文化，第三類是包括中國文學、歷史kah哲學，第四類是包括商務、藝術、書法、烹飪kah旅遊等特色課程。十四年後的2018年九月，全世界有149個國家（地區）建立了530間「孔子學院」和1,113個中小學孔子課堂，中外專兼職教師4萬6,200人，培養學員超過900萬人。
因為真濟國家擔心「孔子學院」干涉學術自由，做間諜kah收集情報的工作，「孔子學院」kah孔子學說無關係。無錯！2018年八月，bat做過中國國務院總理kah中共中央總書記趙紫陽的秘書鮑彤講：現在普及全球的「孔子學院」，攏是teh thún踏這位先哲kah伊的學說。Chiah-ê「孔子學院」攏kah孔子無關係。In攏姓共。照習近平的講法in攏姓黨。
2005年中國佇瑞典Sutokhom大學成立歐洲第一間「孔子學院」，2019年十二月，瑞典關掉佇4間大學設的「孔子學院」，是歐洲第一個完全除掉「孔子學院」的國家。2004年十一月十七，美國馬里蘭大學設立北美洲第一間「孔子學院」，2020年一月十七關掉。Chit中間一間大學一間大學相續設立「孔子學院」，無諾久，一間一間關掉。原本預定2020年底關掉全美「孔子學院」。
四月二六，kah中國一粒一的巴基斯坦，上大都市卡拉刺發生一件自殺式炸彈攻擊，「孔子學院」院長黃桂平、兩名老師kah巴基斯坦司機現死。Chit件爆炸案發生佇卡拉刺大學「孔子學院」附近。炸彈客是一名三十歲、兩個囝仔的老母，伊是「孔子學院」的學生，伊mā當場死亡。
想「中國屎khah芳」的人講的話bē聽得，中國「孔子學院」m̄-thang學！