中國國民黨主席江啟臣那會chiah呢三八!

    六月初六,中國國民黨的高雄市長韓國瑜hō͘高雄市民用九十三萬九千0九十票罷免掉,比年半前當選的八十九萬兩千五百四十五票,khah濟過四萬六千五百四十五票。M̄-nā hō͘全台灣的人驚一tiô,相信mā hō͘韓國瑜市長本人驚幾nā tiô kohtiô。驚kah心魂無定,拖三工才決定放棄提出罷免無效的訴訟。驚一tiô koh khahtiô的是中國國民黨中央,驚kah黨主席江啟臣烏白亂講話,連伊本人mā m̄知影家己teh講啥。

六月十二,中央選舉委員會舉行委員會議,審查高雄市第三屆市長韓國瑜罷免案投票結果,有效同意票數比不同意票數khah濟,而且同意票數有達到原選舉區選舉人總數的四分之一以上,該罷免案投票結果通過。中央選舉委員會tī仝一日公告罷免投票結果。Koh有佇會中討論通過高雄市第三屆市長補選投票日期,決定tī民國109年、也tio̍h是2020年八月十五日(拜六)舉行投票,而且隨時公告hō͘逐個知。

  咱攏知影,chit遍hông罷免掉的韓國瑜市長是中國國民黨員;高雄市議會六十八席議員,中國國民黨三十九席、民進黨二十席、無黨團結聯盟三席、時代力量兩席、親民黨一席、台聯一席、無黨籍兩席,中國國民黨籍佔五成七,猶未過身以前議長許崑源mā是中國國民黨籍,高雄市是真真正正的「一黨獨大」。目前高雄市議會干單減一位中國國民黨籍的議長,chhun三十八席猶原是超過半數,若是無意外,議長改選結果中國國民黨提名的候選人當選的機會猶原khah大。Chit-má干單chhun市長tio̍h補選niā-niā。

  照勢面看起來,代表民進黨出征的陳其邁的嬴面可能khah大,抵則hông罷免掉的韓國瑜市長是中國國民黨籍,中國國民黨hō͘市民的印象可能有khah無好,無論提名啥人攏可能有khah輸面。但是選出來的結果,若是中國國民黨提名的候選人當選,高雄市tio̍h koh kah韓國瑜市長hông罷免以前仝款,中國國民黨佇高雄市猶koh是「一黨獨大」。

  六月十四,中國國民黨主席江啟臣佇伊的面冊發文表示,高雄市長補選,(中國)國民黨一定tio̍h戰,高雄絕對bē使變作只有「一黨獨大」。江啟臣黨主席敢知影伊家己teh講啥?高雄市若無愛「一黨獨大」,上好的辦法是市長mài選hō͘中國國民黨提名的候選人。選siáng neh?若是高雄市的中國國民黨支持者,攏聽黨主席江啟臣的話,逐個當然tio̍h選hō͘民進黨提名的陳其邁。

  莫怪有人會講,中國國民黨主席江啟臣那會chiah呢三八!