中共的垃圾手伸入來咱立法院弄傀儡!

  五月二二暗,日本《產經新聞》台北支局長Yaita Akio矢板明夫)佇面冊發文表示:「Chit幾工因為立法院的亂象,迫出上萬個群眾上街頭抗議。才有一寡人注意tio̍h我的好朋友、佇澳洲的中國流亡作家袁紅冰,早早今年二月tio̍h顯示中共的統戰作戰計畫。」Yaita Akio(矢板明夫)指出,「若對照最近國會狀況,chit-má看起來袁紅冰講的應該是真的

  袁紅冰一開始tio̍h透露,中國國台辦主任宋濤佇台灣大選結束了後,受tio̍h習近平非常嚴厲的說教,指責伊介入台灣大選摸無準歸個過程情況,操作了無好勢,執行了無拍拚。而且講chiah-ê消息是中共體制內良知人士傳出來的。

 袁紅冰講,台灣大選了後,中共根據韓國瑜可能會成作立法院院長,傅崐萁可能會擔任立法院國民黨黨團總召的情報,習近平真緊tio̍h對主管台灣事務的中國政協主席王滬寧kah國台辦主任宋濤做出兩項指示:第一,叫in tio̍h掠tiâu韓國瑜kah傅崐萁tī台灣立法院任命的時機,有效展開對台統戰的戰略性攻勢,tio̍h「佔領台灣立法院的制高點」而且佇台灣政權結構內部拆裂孔嘴、同時速速擴大戰果。第二,透過特定人士,催促韓國瑜、傅崐萁kah中國國民黨立法院的黨團,用查弊案、反貪腐的名義,追查台灣潛水艦國造案的問題,進一步破壞民進黨執政當局的國防自主、全民國防的戰略。

    一月二七,中國國台辦有向習近平kah全國政協主席王滬寧提交一項文件「佔領台灣立法院制高點的統戰戰略要點」。

  Koh來是運用議會改革的名義,提出立法院的調查權、總統的質詢權、反台獨法等法案。準講chiah-ê法案一時無法度通過,mā會tàng造成台灣立法權的混亂,甚至hō͘立法院bē 振bē動,koh會tàng有效降低民進黨行政當局的執政效率,也tio̍h是降低賴清德的執政效率。

最後,透過特定人士佇韓國瑜主導「台灣民主基金會」了後,敦促伊透過「台灣民主基金會」kah世界各國的華僑組建的「中華統一促進會」等組織,進行密切的接觸交流。

五月二四,袁紅冰接受中央社採訪的時表示,伊二月講的hit-ê消息是由習近平無膽去揺掣(chhoah)的紅二代所提供的,中共想beh kā中國國民黨塑造作中共軍的先頭部隊,用按呢內神通外鬼來完成統一的目標。

  Chit幾工台灣立法院的鬧劇,一齣一齣攏照袁紅冰二月所講的teh演,hō͘咱那像看tio̍h中共的垃圾手伸入來咱立法院teh弄傀儡。真正會hông驚!

(240531)

 

註:習近平 請唸華語