日本有一個流行用語：「ワンマン社長」（oan-man siā-chió），日本人thiau-工kā英文“one man”寫作片假名，無愛用日本漢字寫作「一人」，chit-ê「ワンマン」（oan-man）佇chia有伊特別的意思，是指一個獨裁獨斷的社長。日本人講的「社長」咱台灣話除了有「社長」的用法，mā會使講是「總經理」抑是「頭家」。台語譯作「一人社長」（chi̍t-lâng siā-tiúⁿ）可能khah方便、khah清楚。
日本的「一人社長」m̄是凊彩封的，伊至少tio̍h有下面幾種特色，才擔當會起chit-ê封號：一人社長認為全公司伊上蓋gâu，伊所做的決定攏是上正確的，別人的意見伊聽bē落去；伊的權威無人會使挑戰，伊講出的tio̍h是話；伊早起講的話，下晡會講無仝款、甚至是否定家己的話，隨在伊的心情好bái作改變。若有人懷疑伊「朝令夕改」，伊會應講「朝令有錯，夕改又何妨？」伊對現場的情形無一定瞭解，但是意見真濟；員工做tio̍h的，是因為伊領導有方，伊本人做m̄-tio̍h的是因為員工配合了無好勢；伊的曆日仔歸年透天攏印黑的、無啥物假日歇困日，透早tio̍h「ong-ong-ong」、到半暝mā猶koh teh「ong-ong-ong」，要求所有的員工攏tio̍h kah伊仝款拚勢。大細項代誌伊攏beh管kah tio̍h；上關心的是新聞媒體講伊按怎；伊合意的人惜入骨、無合意的人插都無愛插伊；聽講伊重用的人beh離開，伊會盡一切的法度苦苦kah留，一旦真正離開，伊會kā罵kah無一塊。
台灣是m̄是有chit款「一人社長」，我無真清楚。但是我知影台灣上無欠的是「一人政黨」kah「一人黨主席」。有可能是「一人政黨」自然生出「一人黨主席」；mā有可能是因為有「一人黨主席」、一個好好的黨才變作「一人政黨」。
頂日有聽人講「民眾黨」是柯文哲、柯夫人陳佩琪kah hông稱作「太后」的蔡碧如的「三人政黨」，chit-ê人可能是因為「民眾黨」的「眾」字mā有人寫作三人疊作夥的「众」字，才按呢講，無完全正確。有人講，頂日柯文哲講beh封in某陳佩琪作民眾黨的「精神領袖」，所以講「民眾黨」是「兩人政黨」，he只不過是笑談，bē使當作正經。歸尾柯文哲猶原會家己封作「民眾黨的精神領袖」。所以無論按怎講，「民眾黨」是一個假的包換的「一人政黨」。
佇台灣的幾個「一人政黨」有一個足重要的特色是，「一人黨主席」一旦坐佇hit隻椅仔，尻川phóe隨時hō͘麥芽膏黏tiâu-tiâu剥bē離，註該伊黨主席作kah死為止，無人敢去挑戰。「一人政黨」koh另外一個特色是，佇民主自由的社會內底，無法度變作大黨，真gâu拖命，準講有時勢面bē-bái，mā連鞭hoa去。
台灣俗語話講「好種m̄傳（thn̂g），歹種m̄斷。」真的！